دشت و صحرا میں کبھی خاک اڑا بھی نہ سکوں

 دشت و صحرا میں کبھی خاک اُڑا بھی نہ سکوں

اتنا گمراہ نہ کریو، تجھے پا بھی نہ سکوں

مشرب موسیٰؑ پہ حسرت کا عصا تھامے ہوئے

خضرؑ کو ڈھونڈ رہا ہوں کہیں جا بھی نہ سکوں

اب تُو مجھ سے نہ جُدا ہونے کی قسمیں کھا لے

میں تو یعقوبؑ نہیں اشک بہا بھی نہ سکوں

کیا ستم ہے مِری تصویر بنانے والے

میں تجھے اپنے تصور میں بسا بھی نہ سکوں

یوں جلا کوئی شرر تک نہ رہے مجھ میں وقوع

طور اُمید کا اک تنکا جلا بھی نہ سکوں

ہوش اُڑا جا کہ سوا تیرے نہ سوچوں کچھ بھی

 نیند اُڑا جا کہ کوئی خواب سجا بھی نہ سکوں

عقل میں بھی تو سما دل میں سمانے والے

یاد کچھ رکھ نہ سکوں اور بُھلا بھی نہ سکوں

اپنے دامن کا ہر اک تار ادھیڑے ہوئے میں

اپنی شاداب طبیعت کو چُھپا بھی نہ سکوں

شاداب جاوید