عارفانہ کلام حمد نعت منقبت
آنکھ سے ہجر مدینہ میں جو طوفاں نکلا
اس کا ہر قطرہ دلِ لعلِ بدخشاں نکلا
بارِ اول جو پڑی گنبدِ خضریٰ پہ نظر
صدفِ جاں سے مِری گوہرِ ارماں نکلا
تیرگی چَھٹ گئی، عالم میں اُجالے پھیلے
جب وہ خورشیدِ یقیں، نُور بداماں نکلا
حزبِ حق لشکرِ کفّار پہ غالب آئی
صدق ہر رنگ رقیبِ سر و ساماں نکلا
سلکِ تقویٰ و تورّع پہ تجمل آیا
درجِ ہاشم سے جو دُردانۂ ایماں نکلا
جب سے مداّحئ حضرتﷺ ہے وظیفہ اپنا
تب سے افلاس مِرے گھر سے پشیماں نکلا
جلوہ افروز ہُوا اس پہ جو حُسنِ مُطلق
دل مِرا روکشِ اورنگِ سلیماں نکلا
دولتِ عزم و یقیں جب سے میسّر آئی
جمعِ اوہام مِرے دل سے پریشاں نکلا
یا نبیﷺ کہہ کے پُکارا تو بُلایا در پر
خارِ ہِجراں دلِ عشّاق سے آساں نکلا
معنئ نُکتۂ لولاک کے ادراک کے بعد
سب کا ہونا مِری سرکارؐ کا احساں نکلا
زِندگانی میں سزاوارِ ملامت ناظم
مرگ آئی تو بڑا صاحبِ عرفاں نکلا
بشیر حسین ناظم
No comments:
Post a Comment