سرکار جب عطا کیا عرفان نعت ہے

 عارفانہ کلام حمد نعت منقبت

سرکارؐ جب عطا کِیا عُرفانِ نعت ہے

آساں ہُوا کٹھن مجھے میدانِ نعت ہے

روضے کی جالیوں سے ملے گا اسے قرار

مُدت سے میرے دل میں جو ارمانِ نعت ہے

حمد و ثناء کے بعد کِیا ذکرِ اہلِ بیت

در اصل ذکرِ آلؑ ہی اعلانِ نعت ہے

آساں کرے گا دیکھنا برزخ کی منزلیں

رختِ سفر میں رکھا جو سامانِ نعت ہے

پڑھتے ہیں جو نماز میں اس آلؑ پر درود

میرے خیال میں تو یہ ایوانِ نعت ہے

صلو علیہ آلہِﷺ وِردِ زباں کے بعد

کامل یقین رکھتا ہوں امکانِ نعت ہے

کہتا رہوں گا واعظا میں یا علیؑ مدد

ما بعد یا نبیﷺ یہی ایمانِ نعت ہے

کہتے ہیں لوگ مجھ کو غلامِ رسولِؐ پاک

کتنا بڑا فقیر پہ احسانِ نعت ہے

زہراؑ بتول اور حسنؑ حیدرؑ و حسینؑ

حکمِ رسولﷺ مان، گلستانِ نعت ہے

کرب و بلا کہانی سمجھنے سے پیش تر

ناداں سمجھتا کیوں نہیں کُفرانِ نعت ہے

دیکھے سنہری جالیاں اذنِ حضورؐ سے

ارشاد بھی جو شاعرِ دیوانِ نعت ہے

ارشاد نیازی