یا رب یہ میرا دل ہے کہ دیوان نعت ہے

 عارفانہ کلام حمد نعت منقبت

یارب یہ میرا دل ہے کہ دیوانِ نعت ہے

تطہیر ہو گئی ہے یہ فیضانِ نعت ہے

پہنچوں سرِ مدینۂ عشاقِ آرزو

پکڑا ہوا جو خیر سے دامانِ نعت ہے

دھڑکن میں گونج صلِ علیٰ کی بصد خلوص

میری ہر ایک سانس میں امکانِ نعت ہے

دل میں رواں رکھے ہے روانی درود کی

دل کے بہت قریب جو شریانِ نعت ہے

خود کو حرم میں دیکھ رہی ہوں بچشمِ تر

یہ معجزہ ہے یا مِرا وجدانِ نعت ہے؟

لگتا ہے جیسے رات بسر کی مدینے میں

یہ خواب تو نہیں مِرا عرفانِ نعت ہے

گِریہ فِراق عشق و جنوں ہجر اور خلش

کچھ بھی نہیں یہی میرا سامانِ نعت ہے

کیا نام ہے یہ نامِ محمدﷺ خدا قسم

یہ نام ہی تو شمع شبستانِ نعت ہے

آقاﷺ قبول کیجیے ثروت کا یہ کلام

گر میرا ایک حرف بھی شایانِ نعت ہے

ثروت رضوی