رب کی خوشنودی یوں پائیں تو مزا آ جائے

 عارفانہ کلام حمد نعت منقبت

رب کی خُوشنودی یوں پائیں تو مزہ آ جائے

ہم جو آقاﷺ کو منائیں تو مزہ آ جائے

حسرتیں میری بر آئیں تو مزہ آ جائے

وہ مجھے در پہ بلائیں تو مزہ آ جائے

ہم جو خاک در محبوب لگا کر رخ پر

ماہ و انجم کو لجائیں تو مزہ آ جائے

مجھ گنہ گار کو سرکارﷺ دم باز پسیں

اپنا دیدار کرائیں تو مزہ آ جائے

جب نکیرین مِری قبر میں آئیں، اس دم

آ کے وہ جلوہ دکھائیں تو مزہ آ جائے

مجھ گنہگار کو جب قدسی پکڑ لیں سر حشر

آ کے سرکارﷺ چھڑائیں تو مزہ آ جائے

جام، کوثر کا وہ ہونٹوں سے لگا کر اپنے

ہم سے پیاسوں کو پلائیں تو مزہ آ جائے

راحت خستہ مسلماں اگر ان کی سیرت

اپنے بچوں کو پڑھائیں تو مزہ آ جائے

راحت انجم