عارفانہ کلام حمد نعت منقبت
والضحیٰ، واللیل کی آیاتِ پُر انوار سوچ
سوچنا ہے تو شبیہِ احمدﷺ مختار سوچ
نعت پاک مصطفیٰﷺ کے واسطے درکار ہے
عشق، پاکیزہ تخیل، عشق میں سرشار سوچ
ماورائے عقل و دانش مصطفیٰﷺ کی رفعتیں
محوِ حیرت عقل ہے بے بال و پر افکار سوچ
آیت لا ترفعوا سے یوں نہ کر صرفِ نظر
ہو گیا قصر عمل تیرا اگر مِسمار سوچ
رُوئے انور مصطفیٰﷺ کا کیسا ہو گا نور بار
جب درخشندہ ہے انﷺکا ذرۂ پیزار سوچ
وقت کی رفتار دم سادھے ہوئے بیٹھی رہی
صاحب معراجﷺ تھا کتنا سُبک رفتار سوچ
کر مجلی ذہن و دل کو اس عمل سے اے شفیق
مصطفیٰﷺ کے آستانے کے در و دیوار سوچ
شفیق رائے پوری
No comments:
Post a Comment