دیوانگئ شوق کا ساماں سجا کے لا
ناداں گُہر کوئی سرِ مژگاں سجا کے لا
فنکار تُو اگر ہے تو فن کا دکھا کمال
تصویرِ یار تا حدِ اِمکاں سجا کے لا
گُلشن پہ ہے خزاں کا تسلط تو غم نہیں
دل میں فریبِ حُسنِ بہاراں سجا کے لا
دے ماہتاب بن کے اندھیروں کو روشنی
مُردہ دلوں کے واسطے درماں سجا کے لا
ہم آج تیری قید سے آزاد ہو گئے
اے زندگی اب اور ہی زنداں سجا کے لا
پھر زخم مُندمل ہوئے جاتے ہیں اے ندیم
تُو میرا مہرباں ہے، نمکداں سجا کے لا
عالم کا جو شفیق ہے رحمت ہے سر بسر
اس کا خیال نزدِ رگِ جاں سجا کے لا
شفیق دہلوی
No comments:
Post a Comment