کہتا ہے نعت وہ جسے عرفان نعت ہے

 عارفانہ کلام حمد نعت منقبت

کہتا ہے نعت وہ جسے عرفانِ نعت ہے

جانانِ جاں ہی شمع شبستانِ نعت ہے

جامی کا سوز دے مجھے سعدی کا رنگ دے

فکر رضا دے یا خدا ارمانِ نعت ہے

الفاظ تول تول کے میزانِ شرع میں

رکھنا قدم سنبھال کے میدانِ نعت ہے

جس کو طلب ہوں مدحِ پیمبرؐ کے زاویے

قرآن اس کے واسطے سامانِ نعت ہے

غزلوں نے اس لیے مجھے مائل نہیں کیا

پیدائشی خمیر میں رجحانِ نعت ہے

بعد از اذان ہر گھڑی؛ ہر آن ہر طرف

آواز گونجتی ہے وہ ایوانِ نعت ہے

بعد از زہیر کعب اسی کا ہے غلغلہ

مداح مصطفیٰؐ ہے جو حسانِ نعت ہے

بخشش کے کام آئے گا تھامے رہو اسے

پروانۂ نجات یہ دامانِ نعت ہے

نعتِ نبیِ ہے اصل میں تحمید کِبریا

عنوانِ حمد ہی مِرا عنوانِ نعت ہے

مازاغ ہے کہیں کہیں واللیل و والضحیٰ

قرآں میں جا بجا یہ گلستانِ نعت ہے

وہ روحِ کائنات ہے اس کی ثناء کرو

ہر شعبۂ حیات میں امکانِ نعت ہے

اِس کو ردا عطا ہو شہنشاہِ دو جہاںؐ

کوکب کو بھی زہیر سا میلانِ نعت ہے

کوکب جیلانی