یہ جو ٹکڑے ہیں دلِ ناکام کے
پُھول ہیں گویا چراغِ شام کے
میرے نالوں کی شرر ریزی سے آج
بُجھ گئے تیور چراغِ شام کے
دفن اُن کو کر دیا،۔ اچھا کیا
دل کے ٹُکڑے اور تھے کس کام کے
طاقت اُس در تک تھی جانے کی کہاں
لے چلا ہے شوق بازو تھام کے
کروٹیں بدلے نہ بدلے آسماں
اب تو کیا آئیں گے دن آرام کے
جس جگہ ہوتا ہے دل کا تذکرہ
بیٹھ جاتے ہیں کلیجہ تھام کے
وقت سے پہلے ہی حامد سو گئے
تم تو عادی بھی نہ تھے آرام کے
مرزا حامد لکھنوی
No comments:
Post a Comment