اداس موسم دھواں فضائیں کہ خاک سورج اڑا رہا ہے

 اُداس موسم دُھواں فضائیں کہ خاک سُورج اُڑا رہا ہے 

یہاں کے منظر بتا رہے ہیں یہاں کوئی سانحہ ہُوا ہے

یتیم لاغر غریب بچوں پہ بُھوک جیسی بلا پڑی ہے 

امیر شہروں میں اپنی دولت عیاشیوں پر لُٹا رہا ہے

بنامِ مذہب، برائے مِلّت یہ نسل اور قومیّت کی جنگیں 

خٗدائے برتر! تِری زمیں پر عجب تماشہ لگا ہوا ہے

جو سات عشروں سے خاک و خوں میں دبی ہوئی تھی سسک رہی تھی 

ہماری بوڑھی دُعا نے آخر فلک کو سر پر اُٹھا لیا ہے

ہماری نسلیں ہر ایک غاصب سے صُبح اُمید تک لڑیں گی 

سری نگر کی نواحی بستی میں ایک بچہ بتا رہا ہے

ہم اپنی آبادیاں بڑھا کر جو قرض تقسیم کر رہے ہیں 

ہمارا حاکم اُسی تناسب سے اور قرضے بڑھا رہا ہے

ہمارے بچے پرائے ملکوں میں رزق لینے کو جا رہے ہیں 

ہماری روٹی کا زیادہ حصہ دفاعی جبڑوں میں آ گیا ہے

اسلم رضا خواجہ