ذوق سخن جو لازم سامان نعت ہے

 عارفانہ کلام حمد نعت منقبت

ذوقِ سخن جو لازمِ سامانِ نعت ہے

عشقِ رسولﷺ شاملِ ارکانِ نعت ہے

نعتِ نبیﷺ سُنا گئے دادا رسولؐ کے

گویا جہاں میں ان سے ہی عرفانِ نعت ہے

لب پہ جنابِ آمنہؑ کے نعت ہے رواں

لوری کے حرف حرف میں اک شانِ نعت ہے

تھے حامدِ رسولﷺ ابو طالبِؑ عظیم

یہ اسمِ پاک خاصۂ خاصانِ نعت ہے

بی بی خدیجہؑ حرفِ تسلی میں جو کہیں

وہ گُفتگو بھی سر بسر اعلانِ نعت ہے

نعتِ نبیﷺ کا عکس مناجاتِ فاطمہؑ

کاشانۂ رسولﷺ شبستانِ نعت ہے

جب بھی کہا علیؑ نے کوئی نعتیہ کلام

سب نے کہا یہ لولو و مرجانِ نعت ہے

ایوبؓ اور حسّانؓ کی پہچان بزمِ نعت

ہر عہد میں رواں یہ قلمدانِ نعت ہے

صدیوں سے نعت لکھی، مگر تشنگی ہنوز

نے انتہائے عشق نہ پایانِ نعت ہے

چادر عطا ہوئی ہے جو بُردہ شریف پر

یہ معجزہ گواہئ وِجدانِ نعت ہے

سِیرت کی روشنی میں ہو تہذیب کی نمو

ہاں یہ چلن ہی حاصلِ عنوانِ نعت ہے

واجب ہے احتسابِ عمل، رُوحِ انقلاب

”ہر شعبۂ حیات میں اِمکانِ نعت ہے“

اقلیمِ شعر دائمی رفعت جو پا گئی

شاعر ہر اک زباں میں سُخندانِ نعت ہے

ہم نے تو خُود غزل میں بھی نعتِ نبیؐ سُنی

کتنا وسیع ترین یہ دامانِ نعت ہے

آلِ نبیؑ کا ذکر بھی، ذِکرِ رسولﷺ ہے

سوچو تو مرثیہ بھی تو ایوانِ نعت ہے

مجھ بے نوا کو کچھ جو سُخن کا شعور ہے

یہ بھی تو میرے واسطے احسانِ نعت ہے

پایا ارم خدائے سُخن سے یہ مرتبہ

میری بھی نعت شاملِ دِیوانِ نعت ہے

ارم اقبال نقوی