جتنے پتھر ہیں سبھی مجھ میں لگاتے جاؤ
مجھے دیوار کی مانند اُٹھاتے جاؤ
میرے چہرے کو پڑھو ایک کہانی کی طرح
اور جذبات کی تصویر بناتے جاؤ
یا مقدر میں مِرے اپنا اضافہ کر دو
یا مِرے ہاتھوں کی تحریر مٹاتے جاؤ
ایک کے بعد کرو ایک اندھیرے میں شگاف
ایک کے بعد دِیا ایک جلاتے جاؤ
آج دستار کی قیمت ہے کسی سر کی نہیں
میرا سر کاٹ کے دستار چُراتے جاؤ
میرے ماتھے پہ ستارے کی جگہ خالی ہے
اپنے ہاتھوں سے کوئی داغ سجاتے جاؤ
تِری آنکھوں میں قیامت کے ہیں میخانے مراد
اپنی آنکھوں سے کوئی جام پلاتے جاؤ
بڑا چپ چاپ سا گُمنام سا رستہ ہوں مراد
التجا ہے کہ مِری خاک اُڑاتے جاؤ
رحمان امجد مراد
No comments:
Post a Comment