مجھ سے مت پوچھ مرے درد کی شدت اے دوست

 مجھ سے مت پوچھ مِرے درد کی شدت اے دوست 

دل مِرا دیتا نہیں اس کی اجازت اے دوست

کیوں صفائی پہ صفائی دئیے جاتا ہے مجھے

میں نے تو کی ہی نہیں کوئی شکایت اے دوست

میرے ہر راز سے واقف ہوئی ساری دنیا

رنگ لے آئی ہے آخر تِری محنت اے دوست

زندہ رہتا ہے کوئی کیسے کسی پر مر کر

تُو نہ سمجھے گا یہ آزارِ محبت اے دوست

کم سے کم تُو تو نہ کر مجھ سے کتابی باتیں

شیخ ہی کافی ہے کرنے کو نصیحت اے دوست

کوئی ہر وقت ہی اچھا تو نہیں رہ سکتا

ہو ہی جاتا ہے برا حسبِ ضرورت اے دوست

تُو نے اچھا ہی کُیا ترکِ تعلق کر کے 

ورنہ کُھلتی نہیں مجھ پر مِری قیمت اے دوست

جن کو ہم نے کبھی چھلکایا نہیں، پیتے رہے

کیا بتائیں تجھے اُن اشکوں کی لذت اے دوست

بے یقینی کا وہ عالم ہے تِری دید کے بعد 

اب تلک بھی نہ گئی آنکھوں کی حیرت اے دوست

راجیش ریڈی