میں تو صدا لگا چکا اُس کے دیار میں

 میں تو صدا لگا چکا اُس کے دیار میں

اب دیکھنا ہے کتنا اثر ہے پُکار میں

ہر ہر قدم سنبھال کے رکھّا، بہ احتیاط

اُلجھا کبھی نہ گردشِ لیل و نہار میں

جتنا کہ صبح و شام کی رنگت میں ہے تضاد

اُتنا ہے فرق آپ کے قول و قرار میں

ہر دم اسے پرکھنے کی کوشش نہ کیجیے

انساں سمجھ میں آتا ہے بس ایک بار میں

دورِ خزاں تو چین سے آ کر گُزر گیا

یہ کیسی آگ لگ گئی فصلِ بہار میں

ہے بات گھر کی گھر میں رہے تب تو ٹھیک ہے

اچھّا نہیں ہے عام کریں اس کو چار میں

احسن کسی کے وعدے پہ مت کیجیے یقین

کتنے ہی خواب ٹوٹ چکے انتظار میں

مشتاق احسن