ہمارا جذب انہیں کھینچ لائے گا گھر سے

 ہمارا جذب اُنہیں کھینچ لائے گا گھر سے

یہ کب اُمید تھی پُھوٹے ہوئے مقدر سے

شہید کون ہُوا قتل گاہ میں خنجر سے

لہو جو روتی ہے تلوار چشم جوہر سے

بلائے جاں ہے بخیلوں کے واسطے دولت

ہلاک ہو گیا قارون کثرت زر سے

وہ دو گھڑی جو عیادت کو میری آئے تھے

ابھی تک آتی ہے بُوئے عروس بستر سے

مِٹے نہ سوزشِ دل آہِ سرد سے یا رب

یہ شمعِ بزم نہ ٹھنڈی ہو بادِ صرصر سے

غمِ فراق سے کیوں دل نہ ٹکڑے ٹکڑے ہو

کہ چُور چُور ہو شیشہ لڑے جو پتھر سے

جگر میں زخم کوئی پڑ گیا نیا شاید

لہو ٹپکتا ہے ہر وقت دیدۂ تر سے

جواب نامہ بھی بھیجا نہ یار نے عشرت

بہت خجل میں ہوا اپنے قلبِ مُضطر سے​

عشرت لکھنوی

خواجہ محمد عبدالرؤف