بچھڑ کے ہم سے نہ لی اس نے پھر خبر کوئی

 بچھڑ کے ہم سے نہ لی اُس نے پھر خبر کوئی

ہمارے حال سے غافِل تھا اس قدر کوئی

یہ ایک دل ہی نہیں، جان بھی فِدا کر دیں

نگاہِ ناز سے دیکھے ہمیں اگر کوئی

ہمیں بھی منزلِ مقصُود کا نشان مِلے

رہِ طلب میں ہو اپنا جو راہبر کوئی

پیام اُن کا جو لائے تو آئے دل کو یقیں

صبا سے بڑھ کے نہیں اور معتبر کوئی

اُٹھوں تو صُبح کو چہرہ مِرا ہو مِثلِ سحر

مِرے نصیب میں ایسی بھی ہے سحر کوئی

ہماری قدر نہ کی زندگی میں تو، لیکن

کرے گا یاد ہمیں سوز! عُمر بھی کوئی

ڈاکٹر سردار سوز