مُشکلوں میں مُسکرانا سیکھیے
پُھول بنجر میں اُگانا سیکھیے
جو چلے پرچم اُٹھا کر دوستو
ساتھ اس کا ہی نبھانا سیکھیے
کھڑکیوں سے جھانکنا بے کار ہے
بارشوں میں بھیگ جانا سیکھیے
آندھیاں جب دے رہی ہوں دستکیں
تب دِیے کی لَو بچانا سیکھیے
تاک پر دھر کے اصولوں کو کبھی
نام اپنا مت کمانا سیکھیے
خامشی سے آج سُنتا کون ہے
شور محفل میں مچانا سیکھیے
ڈالئے دریا میں یوں مت نیکیاں
اب بھلا کر کے جتانا سیکھیے
تان کے رکھیے اسے ہر دم مگر
اس کے در پہ سر جُھکانا سیکھیے
ان کی یادوں سے ہوئی نم آنکھ کو
آپ دُنیا سے چُھپانا سیکھیے
نیرج گوسوامی
No comments:
Post a Comment