یہ شام یہ بادل یہ ہوا یاد رہے گی

 یہ شام یہ بادل یہ ہوا یاد رہے گی

ساون تِری ایک ایک عطا یاد رہے گی

مستی بھرے جھونکے ہیں کہ چھلکے ہوئے ساغر

بل کھاتی ہوئی کالی گھٹا یاد رہے گی

بُھولوں گا نہ میں بھی تِری مستانہ ادا کو

تجھ کو بھی مِری لغزشِ پا یاد رہے گی

اس شوخ کے لب چُوم لیے جام سمجھ کر

تا عمر یہ رنگین خطا یاد رہے گی

شرما کے تِرا منہ کو چُھپانا سرِ محفل

اے جانِ حیا! یہ بھی ادا یاد رہے گی

ناراض ہوئے وہ بھی، ہمیں بھی ہے نِدامت

اظہارِ تمنّا کی سزا یاد رہے گی

وہ میری غزل سُن کے بڑے پیار سے بولے

کامل! یہ غزل ہم کو سدا یاد رہے گی

کامل چاندپوری