Saturday, 18 May 2024

گھوم آیا اگرچہ ہے سب افلاک تصور

 عارفانہ کلام حمد نعت منقبت


گھوم آیا اگرچہ ہے سب افلاک تصور

چومے ہے مدینے کی مگر خاک تصور

جس پر کروں نقش آپؐ کے نعلینِ مقدس

لاؤں میں کہاں سے بھلا وہ پاک تصور

پہنچو جو مدینے میں تو رہنا ہے مؤدب

اس شہر میں ہونا نہیں بے باک تصور

اس ذات کی تمدیح کہاں مجھ سے ہے ممکن

کیا میرا شعور، آگہِی، ادراک، تصور

اس بارگہِ ناز میں قابو میں جنوں ہو

کرنا نہ گریبان وہاں چاک، تصور

لوٹے یہ مدینے سے تو اب خود کو مِٹا کر

اوڑھے ہو شہاؐ! عجز کی پوشاک، تصور

معمور ہے گُل ہائے مدینہ کی مہک سے

پہنچا تھا جو آلودۂ خاشاک، تصور

طیبہ نہ رسائی ہو تو ہر آن ہے رہتا

افسردہ و رنجیدہ و غمناک، تصور

ثاقب ہے مؤخر تو اسے دیجے حضوری

ہے اِذن کا طالب شہِ لَولاکﷺ‌ؐ! تصور


ثاقب علوی

No comments:

Post a Comment