کبھی سورج بھی نکلے گا ابھی سورج نہیں نکلا

 کبھی سُورج بھی نکلے گا

ابھی سورج نہیں نکلا

سڑک پر گاڑیوں کے قافلے آئے نہیں

لیکن دِہاڑی دار مزدوروں کا اک سَیلِ بدن مایہ

اُمڈ کر چوک میں آیا

بدن پر میل میں لپٹی ہزاروں سلوٹیں پہنے

پھٹے پیروں میں ٹھنڈی خاک کے جُوتے

تھکے ہاتھوں میں پچھلی شام کی روٹی

لبوں پر رات کی کترن

سروں پر سوچ کی دھجی

تھکی آنکھوں میں کچی نیند کی گٹھڑی

لکیروں اور ہنر سے خالی ہاتھوں میں فقط دس انگلیاں لائے

سُہانی نیند سے اُمید سب کو کھینچ لائی ہے

کوئی آجر اُنہیں روٹی کے بدلے ساتھ لے جائے

کوئی آئے

تو سب کی بجھتی آنکھوں میں

بھڑک کر دیپ جلتے ہیں

سبھی پھر دائرہ دَر دائرہ اُس پر

اُمیدوں سے بھری آنکھوں کے نیزے گاڑ دیتے ہیں

وہ اس انداز میں نظریں گُھماتا ہے

تنومندی پرکھتا ہے

قروُنِ جہل میں جیسے غُلاموں کا ہو بیوپاری

کوئی خوش جسم اُس کے ساتھ جاتا ہے

تو باقی سب کی امیدوں پہ چھائے بھوک کے سائے

گھنیرے کرتا جاتا ہے

کئی بوڑھوں کی آنکھوں میں جوانی جِھلملاتی ہے

اُمیدیں اور سگرِٹ ختم ہو جائیں

تو سب بے جان ہاتھوں سے

شکن اندر شکن لپٹی گزشتہ شام کھاتے ہیں 

اور آنکھوں میں یہ دُکھ لے کر

گھروں کو لوٹ جاتے ہیں

کہ اُن کا کوئی بھی آقا

نویدِ بندگی لے کر نہیں آیا

شہزاد نیر