کب سے ہیں ہم پامال غم غرق الم شاہ امم

 عارفانہ کلام حمد نعت منقبت

کب سے ہیں ہم، پامالِ غم، غرقِ الم، شاہِ امم

بہرِ خدا، ہو اب عطا، چشمِ کرم، شاہِ امم

اُنظر لنا، ختمِ رسلﷺ، اِرحم لنا مولائے کل

اِرفع لنا چشمِ سخا، دستِ نعم، شاہِ اممﷺ

حالِ دروں کس سے کہوں، زاد و زبوں کب تک رہوں

مہجور یوں، کیسے جیوں، کر دو کرم، شاہِ امم

شمس الضحیٰ، بدرالدجیٰ، نورالہدیٰ، کہف الوریٰ

نورِ ازل، شمع ابد، حسنِ اتم، شاہِ اممﷺ

سر تا قدم اوجِ عطا، سر تا قدم موجِ کرم

سر تا قدم خیر البشر، سر تا قدم شاہِ امم

اَذہان سے تو ماورا، اِدراک سے تو ماسوا

اَفہام سے مافوق ہیں تیرے شیم، شاہِ امم

نور و ظُلَم، لوح و قلم، حِل و حرم، ہست و عدم

سب کچھ ہے بس تیری عطا، ذاتِ اتم شاہِ امم

الحمد سے والناس تک، ہر لفظ میں، ہر حرف میں 

جلوہ تِرا، نعتیں تِری، تِرے حشم، شاہِ امم

ایسا بھی ہو ثاقب کبھی، لکھوں جو میں نعتِ نبیؐ

بولے مِرا ہر ہر نفس "شاہِ امم، شاہِ امم"ﷺ

ثاقب قمری مصباحی