اگر وہ زلف ہو زنجیر میری

 اگر وہ زلف ہو زنجیر میری

تو کھل جائے ابھی تقدیر میری

انہیں بھی بے کلی سے بے کلی ہے

غضب ہے آہِ پُر تاثیر میری

بدل ڈالی ہے اس نے دل کی دنیا

نگاہِ یار ہے تقدیر میری

اڑا جاتا ہے مارے ضعف کے رنگ

کھنچے تو کیا کھنچے تصویر میری

اگر شانِ تبسم بھی ہو اس میں

تِری تصویر ہو تصویر میری

وہ جس سے راہ پر آ جائیں خود ہی

نہیں چلتی کوئی تدبیر میری

سخن آموزئ عشرت سے نادر

زباں اب ہے زبانِ میر میری

نادر شاہجہانپوری

جان پال رابرٹ