مزاج زندگی میں قہر بھی ہے مہربانی بھی

 مزاجِ زندگی میں قہر بھی ہے مہربانی بھی

اسی اڑتے ہوئے بادل میں بجلی بھی ہے پانی بھی

جمالِ موت پر قدرت نے پردے ڈال رکھے ہیں

وگر نہ بار ہو جاتا خیالِ زندگانی بھی

سماعت خود تصور کے جھروکے کھول دیتی ہے

بڑی نظارہ پرور ہے صدائے لن ترانی بھی

سکوتِ نیم شب میں ڈوب کر دُہرا رہا ہوں میں

بہت دلچسپ ہے ائے زندگی تیری کہانی بھی

محبت کی حقیقت کا تو پیمانہ نہیں لیکن

محبت کے تقاضے ہیں زمانی بھی مکانی بھی

ہر اک ذرہ میں اک دنیا ہر اک دنیا میں سو عالم

وطن اندر وطن نکلی مِری بے خانمانی بھی

کنایے میں بہت کچھ کام دئیے جاتے ہیں اے کوثر

صریرِ خامہ میں ہوتا ہے پیغامِ زبانی بھی

رشید کوثر فاروقی