دل حبیبوں نے دکھایا ہے کوئی بات نہیں

 دل حبیبوں نے دُکھایا ہے کوئی بات نہیں

فرض تھا ان کا نبھایا ہے کوئی بات نہیں

میرے مونس میرے یاروں نے دوا کے بدلے

زہر گر مجھ کو پلایا ہے کوئی بات نہیں

سادگی دل کی تو دیکھو کہ فریبِ اُلفت

جانتے بُوجھتے کھایا ہے کوئی بات نہیں

رات آتی ہے تو ہو جاتا ہے سایہ بھی جُدا

آج اپنا بھی پرایا ہے کوئی بات نہیں

شکوہ جائز تھا اگر غیر ستاتے مجھ کو

مجھ کو اپنوں نے ستایا ہے کوئی بات نہیں

دل نے سب کے لیے کیا کیا نہ اُٹھا رکھا ہے

کام میرے ہی نہ آیا ہے کوئی بات نہیں

شب کی تاریکیاں مٹ جائیں، اُجالا پھیلے

میں نے گھر اپنا جلایا ہے کوئی بات نہیں

پیچھے پیچھے کوئی خنجر سا لیے آتا ہے

یہ تو خُود ہی مِرا سایہ ہے کوئی بات نہیں

مجھ کو کچھ ان سے شکایت ہے نہ شکوہ حیرت

جان کر اپنا رُلایا ہے کوئی بات نہیں

حیرت فرخ آبادی

جیوتی پرساد مشرا