عارفانہ کلام حمد نعت منقبت
بھیڑ پروانوں کی ہے گنبدِ خضریٰ کے قریب
کھِنچ کے بیمار چلے آئے مسیحا کے قریب
ہر کِرن ریش منوّر کی تجلّٰی افروز
لَنْ تَرَانِیْ کا ہے ہالہ رُخِ زیبا کے قریب
ہر نشانِ قدمِ ناز ہے معراج بکف
اوجِ سدرہ سے بُلند عرشِ معلّٰی کے قریب
میرے رب کو جو مری قیس مزاجی تھی پسند
اس لئے خُلد اتاری گئی خضرا کے قریب
قبر میں تین سوالات کٹھن تھے، لیکن
میرے سرکارؐ نے آسان کیا آ کے قریب
اس ندامت پہ جہنّم بھی ہو پانی پانی
حشر میں ہو گا گنہگار جو آقاؐ کے قریب
ان کے کوچہ کا ہر اک ذرّہ ہے خورشید جمال
کہکشاں گرد ہے اجمل مہِ طیبہ کے قریب
اجمل سلطانپوری
No comments:
Post a Comment