خلاف مصلحتِ عشق چل کے دیکھیں گے
اس آگ میں بھی کسی روز جل کے دیکھیں گے
رہِ وفا میں یہ جس دن بھی کامیاب آیا
تو آدمی کو فرشتے نکل کے دیکھیں گے
تِری ہنسی سے فقط آنسوؤں کو کیا بدلیں
بدل سکے تو مقدر بدل کے دیکھیں گے
میں کس کا ہو کے رہوں گا بھلا زمانے میں
اگر جناب بھی تیور بدل کے دیکھیں گے
ڈبونے والے ذرا اس سے ہوشیار رہیں
ابھی یہ ڈوبنے والے اچھل کے دیکھیں گے
ٹھہر ٹھہر، ارے او انقلابِ وقت ٹھہر
ہم اور اک نئی کروٹ بدل کے دیکھیں گے
حقیر جان کے جو دیکھتے ہیں اے شاکر
وہ ایک روز ہمیں ہاتھ مل کے دیکھیں گے
سلطان شاکر ہاشمی
No comments:
Post a Comment