عارفانہ کلام حمد نعت منقبت
کیوں کر نہ کروں مدحتِ سلطانِ مدینہ
جب پیش نظر ہوں مِرے فیضانِ مدینہ
تہذیب کا گہوارہ دبستانِ مدینہ
یہ خاکِ عرب ہے وہ مِری جانِ مدینہ
خوشبوئے محبت سے معطر ہے زمانہ
کس شان سے مہکا ہے گُلستانِ مدینہ
کیوں سایۂ افلاک میں خدشہ ہو کسی سے
ہو گا وہی ہو گا جو ہے فرمانِ مدینہ
کچھ اور مقامات بھی ہیں ارفع و اعلیٰ
ان سب سے زیادہ ہے مگر شانِ مدینہ
ہے ہیچ ہر اک چیز جہاں کی مِرے آگے
سینے میں تڑپتا رہے ارمانِ مدینہ
نیرنگ ہی نہیں زیر گرانبارئ احساں
ہر صاحبِ ایماں پہ ہے احسانِ مدینہ
نند لال نیرنگ سرحدی
مندھرا، ڈیرہ اسماعیل خان، ریواڑی گوڑگاؤں
No comments:
Post a Comment