فاصلے رکھ کر کبھی یوں درمیاں ملتا نہ تھا

 فاصلے رکھ کر کبھی یوں درمیاں مِلتا نہ تھا

شہر کے لوگوں سے اس کا تب کوئی رشتہ نہ تھا

وہ بکھر جاتا تھا ہر سُو ایک خُوشبو کی طرح

میں جُدائی کے شجر پر اس طرح جلتا نہ تھا

زخم کب کے بھر چکے ہیں اس کی یادوں کے مگر

میں لِپٹ کر اس طرح خُود سے کبھی روتا نہ تھا

وہ لچکتی بیل سا رہتا تھا شانے پر مِرے

قُربتوں کی بھیڑ میں ظالم مگر کُھلتا نہ تھا

وہ حقارت سے مجھے ٹھُکرا کے خُوش تو تھا مگر

میں بھی اپنے ظرف کے آگے کبھی جھُکتا نہ تھا

تیز جھونکا سا گُزر جاتا تھا دل کے صحن سے

وہ مِری صُورت مِرے احساس میں ڈھلتا نہ تھا

پنڈت سریندر سوز