یہ بھُوکے لوگ جس دن گھر سے سڑکوں پر نکل آئے
کرو گے کیا اگر ان بے پروں کے پر نکل آئے
بہت ہُشیار لوگو اس نئی تاریخ کے ہاتھوں
نہ جانے کب تمہارا گھر کسی کا گھر نکل آئے
کہیں کے پھول پتے ہیں کہیں کے پھل کہیں کے ہیں
عجب سے پیڑ اب بھارت کی دھرتی پر نکل آئے
جہاں سب بک رہا ہو اس جگہ ایسا بھی ممکن ہے
مِرے ہی قتل کا الزام میرے سر نکل آئے
در تقدیس کو جب وا کیا تو قصر حرمت سے
بتاؤں کس زباں سے کتنے سوداگر نکل آئے
تمہارا اور تمہارے نظم کا اس روز کیا ہو گا
کبھی سوچا ہے دیواروں میں جس دن در نکل آئے
سعادت آپ اس دیدہ وروں کی بھیڑ میں ڈھونڈیں
بہت ممکن ہے ان میں کوئی دیدہ ور نکل آئے
سعادت عابدی
سید سعادت علی ہاشمی
No comments:
Post a Comment