قلبِ نمرود میں ہے شعلۂ سوزاں پیدا
ہونے والا ہے کوئی بندۂ یزداں پیدا
ننگِ پروانہ مزاجی ہے یہ شعلہ طلبی
دل کے ہر داغ سے کر شمعِ فروزاں پیدا
کیا ملائے گی فروغِ دلِ مومن سے نگاہ
وہ سحر جس سے ہوئی شامِ غریباں پیدا
آپ کھیلیں نہ خدارا مِری خاکستر سے
کوئی فتنہ نہ کرے آتشِ پنہاں پیدا
پرتوِ فکر تِرا موجبِ صد شامِ سیاہ
داغِ سجدہ سے مِرے صبحِ درخشاں پیدا
موت کا خوف نہ کر زیست پہ مرنے والے
موت کر دیتی ہے خود زیست کے ساماں پیدا
غم کے ماروں نے زمانے کو بتایا ہے یہ راز
درد کرتا ہے خود اپنے لیئے درماں پیدا
ضربِ پیہم ہے کشودِ دلِ مومن آصف
زخمِ شمشیر سے ہوتا ہے گلستاں پیدا
سلیمان آصف
No comments:
Post a Comment