دل کی تسکین ہے کسی آس میں تپتے رہنا
عمر بھر گھر کے ہی بَن باس میں تپتے رہنا
ابر کا ایک بھی ٹُکڑا نہ یہاں اُترے گا
گُلستاں کو ہے اسی آس میں تپتے رہنا
ہائے گُلدانوں کے ان پھُولوں کی تقدیر جنہیں
سائباں ہوتے ہوئے گھاس میں تپتے رہنا
دوستو! کوئی بھی شکوہ نہ زباں تک آئے
زیست ہے شدّتِ احساس میں تپتے رہنا
روز پھُولوں کو بتاتی ہے کڑی دُھوپ یہ بات
تم سدا اپنی ہی بُو باس میں تپتے رہنا
سامنے لاکھ گھنی چھاؤں ہو، لیکن اے رند
دشت بے سایہ کو ہے گھاس میں تپتے رہنا
رند ساغری فتح گڑھی
No comments:
Post a Comment