الفت میں اور تو کوئی چارا نہ ہو سکا

 اُلفت میں اور تو کوئی چارا نہ ہو سکا

ہم اس کے ہو گئے جو ہمارا نہ ہو سکا

جاتے ہیں لوگ کُوئے محبت میں بار بار

ہم سے تو پھر یہ عزم دوبارا نہ ہو سکا

جلوے سے پیشتر ہی کیا اس نے دل طلب

اتنا بھی اعتبار ہمارا نہ ہو سکا

رہتے ہیں لوگ صحبتِ اہلِ خِرد میں خُوش

اپنا تو ایک دن بھی گُزارا نہ ہو سکا

ہونے کو اور کیا نہ ہوا عشق میں مگر

جاں بر تِرے فراق کا مارا نہ ہو سکا

ہم ان پر اختیار کی اُمید کیا کریں

جب دل پہ اختیار ہمارا نہ ہو سکا

تھامے ہوئے تھے عقل تو دامانِ احتیاط

لیکن مِرے جنُوں کو گوارا نہ ہو سکا

لُٹ تو چکے تھے عشق کے سودے میں ہم مگر

محسوس عُمر بھر بھر یہ خسارا نہ ہو سکا

ساحر کسی سے کیا ہمیں اُلفت کی ہو اُمید

جب دل بھی دوستدار ہمارا نہ ہو سکا

ساحر سیالکوٹی

رگھبیر داس