سلگے ہوئے من کو اب یہ کس نے ہوا دی ہے

 سُلگے ہُوئے من کو اب یہ کس نے ہوا دی ہے

بُجھتے ہُوئے شُعلوں نے پھر آگ لگا دی ہے

اک پل جو ہے مُٹھی میں تُم اس کو امر کر لو

بِیتے ہُوئے لمحوں نے کب کس کو صدا دی ہے

تُم لوٹ کے آ جانا جب دل میں کسک جاگے

ہم نے تو ہواؤں کو جو بِیتی سُنا دی ہے

کُچھ فرق نہیں رکھا، اپنے میں پرائے میں

جو شخص ملا ہم کو، ہم نے تو دُعا دی ہے

معصُوم تھا دل پہلے، معصُوم تو اب بھی ہے

خُود اس کو تھا اُکسایا، پھر خُود ہی سزا دی ہے

کیسا یہ غضب ڈھایا، خُود اپنے ہُوئے دُشمن

اک بات نہ کہنے کی، کس کس کو سُنا دی ہے

یہ مُلک مِرے مولا، رکھ اپنی اماں میں تُو

بُنیاد پرستوں نے،۔ بُنیاد ہِلا دی ہے

ہاں دل ہو کُشادہ جبآنے سے جھجکنا کیا

آؤ تو چلے آؤ،۔ یہ سب کو منادی ہے

خندق جو ہے اُس جانب، تُم اس کو ذرا بھرنا

دیوار ادھر جو تھی، وہ میں نے گِرا دی ہے

گو خاص نہیں کوئی، پھر بھی میرے شعروں نے

سُنتے ہیں کہ لوگوں میں، اک دھُوم مچا دی ہے

اب اور صبا کیا ہو، اس بُت کے لیے ہم نے

اک ذات جو تھی ہیرا، مٹی میں مِلا دی ہے

سبکتگین صبا