بس اک دو پل کہاں دکھ بولتے ہیں

بس اک دو پل کہاں دُکھ بولتے ہیں
یہاں تو جاوداں دُکھ بولتے ہیں
جہاں تُو ہے وہاں خُوشیاں ہیں لاکھوں
جہاں میں ہوں وہاں دُکھ بولتے ہیں
مِرا دل بھی سمندر کی طرح ہے
اور اس میں بیکراں دُکھ بولتے ہیں
مِرے چُپ چاپ بہتے آنسوؤں میں
برنگِ کہکشاں دُکھ بولتے ہیں
خروشِ موجۂ وحشی نہ پوچھو
تہِ آبِ رواں دُکھ بولتے ہیں
یہاں اب کون سُنتا ہے کسی کی
یہاں تو رائیگاں دُکھ بولتے ہیں
کسی کو کیا نظر آئے گا باقیؔ
مِرے تو بے نشاں دُکھ بولتے ہیں

باقی احمد پوری