نہ سننے میں نہ کہیں دیکھنے میں آیا ہے

نہ سننے میں نہ کہیں دیکھنے میں آیا ہے
جو ہجر و وصل میرے تجربے میں آیا ہے
نئے سرے سے جل اٹھی ہے پھر پرانی آگ
عجیب لطف تجھے بھولنے میں آیا ہے
نہ ہاتھ مِرے نہ آنکھیں مِری نہ چہرہ مِرا
یہ کس کا عکس مِرے آئینے میں آیا ہے
جواز رکھتا ہے ہر ایک اپنے ہونے کا
یہاں پہ جو ہے کسی سلسلے میں آیا ہے
ہے واقعہ ہدفِ سیلِ آب تھا کوئی اور
مِرا مکان تو بس راستے میں آیا تھا
وہ رازِ وصل تھا جو نیند میں کھلا مجھ پر
یہ خوابِ ہجر تھا جو جاگتے میں آیا ہے
جمالؔ! دیکھ کے جیتا تھا جو کبھی تجھ کو
کہیں وہ شخص بھی کیا دیکھنے میں آیا تھا

جمال احسانی