گمانِ بد نہ ہو یوں بدگماں سے کچھ نہ کہا

گمانِ بد نہ ہو یوں بدگماں سے کچھ نہ کہا
گِلے تو لاکھ تھے لیکن زباں سے کچھ نہ کہا
جفائے دوست بھی اک جروِ رازِ الفت ہے
ستم اٹھائے مگر رازداں سے کچھ نہ کہا
وہی بتائے کہ تھی کس کی کارفرمائی
جو گُل نے بلبلِ محوِ فغاں سے کچھ نہ کہا
ہمیں سے حضرتِ دل تھے وہ سب گِلے شکوے
جفا کے باب میں اس مہرباں سے کچھ نہ کہا
زمینِ کوچۂ جاناں کی مل گئی تمثیل
خوشی سے رنج سہے، آسماں سے کچھ نہ کہا
ضرور دونوں میں دیرینہ کچھ مراسم ہیں
جنابِ شیخ نے پیرِ مغاں سے کچھ نہ کہا
عزیز ہے کہ ہے وابستۂ چمن وہ بھی
جلا جو آشیاں برقِ تپاں سے کچھ نہ کہا
جفائے دوست کا کیا حشر میں گِلہ کرتے
تمام عمر جب اس جانِ جاں سے کچھ نہ کہا
عجب نہ تھا کہ وہ حالِ دلِ حزیں سنتے
ہمِیں نے شدتِ دردِ نہاں سے کچھ نہ کہا
دہانِ زخم نوازا، زبانِ خنجر سے
مگر حضور نے مجھ نیم جاں سے کچھ نہ کہا
خلافِ وضع کوئی بات ہم نے خارؔ نہ کی
جواب میں کبھی اس بدزباں سے کچھ نہ کہا 

خار دہلوی