کب گرفتار کسی قید مکانی میں رہے

کب گرفتار کسی قیدِ مکانی میں رہے

ہم تو بہتے ہوئے پانی تھے روانی میں رہے

مشت بھر خاک ہی رستے کی اٹھا کر دے دے

کچھ تِرا ہاتھ ہی منزل کی نشانی میں رہے

کیسا جادو تھا کہ ہم بن گئے پتھر جیسے

کون سا نشہ تھا ہم جس کی گرانی میں رہے

اپنے وقتوں میں بھی ہم اپنے لیے جی نہ سکے

زندگی! ہم تو تِری مرثیہ خوانی میں رہے

میرے اشعار کے پیکر میں سمو دے خود کو

فاصلہ کیوں کوئی الفاظ و معانی میں رہے

موجِ انفاس سے تھوڑا سا دھواں بھی اٹھے

لطف آ جائے اگر آگ بھی پانی میں رہے

جن سے رنگین تھے دنیا کے فسانے محسنؔ

کتنے بے رنگ وہ خود اپنی کہانی میں رہے

محسن زیدی