تم لگا دو عاشق دل گیر پر

تم لگا دو عاشقِ دل گیر پر

ناز ہو جس تیغ پر جس تیر پر

چارہ گر مرتے ہیں کیوں تدبیر پر

چھوڑ دیں مجھ کو مِری تقدیر پر

اس نگاہِ امتحاں کو دیکھنا

ہے کبھی مجھ پر کبھی شمشیر پر

شرم مجھ سے اور وہ بھی وصل میں

تم تو نادم ہو کسی تقصیر پر

دوسرے کو دیکھ سکتے ہی نہیں

آتے ہیں منہ اپنی بھی تصویر پر

یوں تو سو پہلو بٹھائے وصل کے

دل نہیں جمتا کسی تدبیر پر

بھیج کر خط پھر مُکر جانا یہ کیا

دیکھیے آئے ہیں اس تحریر پر

داورِ محشر کے آگے تو سہی 

لوٹ جاؤ تم مِری تقریر پر

گریۂ شب سے توقع تھی بہت

اوس الٹی پڑ گئی تاثیر پر

شوخئ الفاظ کچھ لائے گی رنگ

آنکھ پڑتی ہے مِری تحریر پر

داغؔ سچ ہے جو خدا چاہے کرے

آدمی کا بس نہیں تقدیر پر

داغ دہلوی