ہم سے مستی میں بھی خم کا نہ گلو ٹوٹ گیا​

ہم سے مستی میں بھی خُم کا نہ گلُو ٹوٹ گیا​

تجھ سے پر ساقئ کم ظرف! سبُو ٹوٹ گیا​

شیخ صاحب کی نمازِ سحری کو ہے سلام​

حسنِ نیت سے مصلے پہ وضو ٹوٹ گیا​

پیچ و تاب اس دلِ صد چاک نے کھایا جو کوئی

دستِ شانہ سے تِری زلف کا مُو ٹوٹ گیا​

دیکھ کر کیوں کہ نہ ہو دیدۂ سوزاں حیراں​

پیرہن کا مِرے ہر تارِ رفُو ٹوٹ گیا​

شمع و پروانہ میں تھا رشتۂ الفت جو بہم​

سو وہ اے صبح! تِرا دیکھ کے رُو ٹوٹ گیا​

کشورِ مصر میں قفلِ درِ چشمِ یعقوبؑ​

آئی پیراہنِ یوسفؑ کی جو بُو، ٹوٹ گیا​

دست کاری تِری معلوم ہوئی اے فصاد​

نیشتر رگ میں تو لیتے ہیں لہُو ٹوٹ گیا​

وائے اے شیشۂ دل! سینے میں مانندِ حباب​

ٹھیس سے اس نفسِ سرد کی تُو ٹوٹ گیا​

کاخِ دنیا جو ہے بازیچۂ طفلاں ہے نصیرؔ

کہ کبھو گھر یہ بنا،۔۔ اور کبھو ٹوٹ گیا

شاہ نصیر دہلوی​