تغافل خود ہے اقرار محبت

تغافل خود ہے اقرارِ محبت

یہ خاموشی ہے گفتارِ محبت

نہاں ہو یا نمایاں ہے بہرطور

محبت ہے سزاوارِ محبت

دلِ مہتاب ہو یا چشمِ انجم

نہیں ہے کون بیمارِ محبت

وہ لغزیدہ نگاہیں کہہ رہی ہیں

دلِ نازک پہ ہے بارِ محبت

ز سر تا پا محبت بن گئے ہو

یہی ہوتا ہے انکارِ محبت

تمنائیں ہوئی جاتی ہیں روپوش

کھلے جاتے ہیں اسرارِ محبت

شبستانِ ارم سے کھینچ لائی

نسیمِ صبحِ گلزارِ محبت

یہ کیا جانیں وہ رم خوردہ نگاہیں

روشؔ بھی ہے گرفتارِ محبت

روش صدیقی