دل رکھ تو دیا ہے نگہ یار کے آگے

دل رکھ تو دیا ہے نگہِ یار کے آگے

اف کر نہیں سکتا ہوں خریدار کے آگے

آتی نہیں اب تک اسی باعث سے قیامت

کیا پیش چلے گی تِری رفتار کے آگے

میں حسن سے سکتے میں وہ ہے عشق سے حیراں

دیوار کھڑی ہو گئی دیوار کے آگے

بجلی کی طرح کانپنے لگتی ہے اجل بھی

ٹھہرا نہیں جاتا تِری تلوار کے آگے

اس ضعف میں بھی راہِ محبت میں ہے یہ حال

دو چار کے پیچھے ہوں تو دو چار کے آگے

گلزار میں نرگس سے نہ تم آنکھ ملانا

بیمار کو لاتے نہیں بیمار کے آگے

میں موسیِٰ عمراں، نہ خدا تُو بتِ کافر

باتیں نہ بنا طالبِ دیدار کے آگے

یا کھانے دے گلشن کی ہوا تو اسے صیاد

یا زہر ہی رکھ مرغِ گرفتار کے آگے

گھر میں تو رسائی نہیں لیکن مِری تصویر

دیوار پہ چسپاں ہے درِ یار کے آگے

ان تک بھی پہنچ جائے گا جو حال ہے میرا

ہر روز یہی ذکر ہے دو چار کے آگے

کعبے میں ٹھکانا ہے نہ بت خانے میں اپنا

مر جائیں گے جا کر درِ دلدار کے آگے

سر کاٹ کے عاشق کا نہ اترائیے اتنا

اک دن یہ کِیا آئے گا سرکار کے آگے

فرقت میں بیاں کس سے کروں اپنی مصیبت

کیا حال کہوں میں در و دیوار کے آگے

پہلے یہ دعا مانگ لی اس کو نہ ہو صدمہ

جب درد کہا داغؔ نے غمخوار کے آگے

داغ دہلوی