دل کی بجھتی ہوئی شمعوں کو فروزاں کر دیں​

آگ محفل میں غلاموں کی لگا دیں اے دوست​

دل کی بجھتی ہوئی شمعوں کو فروزاں کر دیں​

گائیں ٹوٹے ہوئے بربط پہ ترانے دل کے​

بزم کو اپنی نواؤں سے غزل خواں کر دیں​

کعبہ و دیر و کلیسا کی بجھا دیں قندیل​

ہر طرف مشرق و مغرب میں چراغاں کر دیں​

توڑ دیں وہم نے پہنائی تھیں جو زنجیریں​

آ گیا وقت کہ اب وَا درِ زِنداں کر دیں​

ڈال دیں وقت کی افسردہ نگاہوں میں نگاہ​

عہدِ پارینہ کو اک خوابِ پریشاں کر دیں​

رنگِ خوں بھر کے بنائیں وہ نئی تصویریں​

کاوشِ مانی و بہزاد کو حیراں کر دیں​

چھین لیں ہاتھ بڑھا کر مہ و پرویں سے چمک​

ہند کی خاک کے ذروں کو درخشاں کر دیں​

مسندِ عیش سے شاہوں کو اٹھا دیں چل کر​

”مورِ بے مایہ کو ہم دوشِ سلیماں کر دیں“​

کب تلک راہ کے کانٹوں سے بچائیں گے قدم​

ان کو تھوڑا سا لہو دے کے گلستاں کر دیں​

اب نظر پھیر لیں ایران کے گلزاروں سے​

نگہِ شوق کو کشمیر بداماں کر دیں​

دے کے احساس نیا ہند کے مہ پاروں کو​

حسنِ یوسف کو چراغِ تہِ داماں کر دیں​

داستاں وامق و عذرا کی بھلا دیں دل سے​

شوق کی جنسِ گراں مایہ کو ارزاں کر دیں​

عام ہو غالب و اقبال کی رعنائیِ فکر​

بے زبانوں کو زباں دے کے زباں داں کر دیں​

کھول دیں سب کے لیے قفلِ درِ مۓ خانہ​

حضرتِ جوش کو سرِ حلقۂ رنداں کر دیں​

​

علی سردار جعفری