باندھا ہے کب سے رختِ سفر یارِ من بیا
اس بار لیت و لعل نہ کر، یارِ من بیا
لگنے کو ہے ہجومِ دل آزردگاں کی آنکھ
بجھنے کو ہے چراغِ نظر، یارِ من بیا
نادیدہ منزلوں کی خبر دے گی جسکی خاک
طے کر لیے ہیں تُو نے کئی ہفت خواں مگر
اب کے بس اس فقیر کے گھر، یارِ من بیا
اڑنے کو صرف دل ہی نہیں مبتلاۓ شوق
کچھ اس سے بھی سوا ہیں یہ پر، یارِ من بیا
دہلیزِ جاں پہ نذر کروں گا بصد خلوص
اشکوں کے دیپ، دکھ کے گہر، یارِ من بیا
ان رتجگوں نے درد کے معنی بدل دیئے
لے کر ذرا سی نیند ادھر، یارِ من بیا
جانِ حسنؔ، گر اب بھی نہیں ہے پیامِ جاں
پھر لے کے کوئی دکھ کی خبر، یارِ من بیا
حسن عباس رضا
No comments:
Post a Comment