مرتے ہیں ہم تو اس صنم خودنما کے ساتھ

مرتے ہیں ہم تو اس صنم خود نما کے ساتھ

جیتے ہیں وے ہی لوگ جو تھے کچھ خدا کے ساتھ

دیکھیں تو کار بستہ کی کب تک کھلے گرہ

دل بستگی ہے یار کے بند قبا کے ساتھ

اے کاش فصلِ گل میں گئی ہوتی اپنی جان

مل جاتی یہ ہوا کوئی دن اس ہوا کے ساتھ

مدت ہوئی موئے گئے ہم کو پر اب تلک

اڑتی پھرے ہے خاک ہماری صبا کے ساتھ

ہم رہتے اس کے محو تو وہ کرتا ہم کو سہو

ہرگز وفا نہ کرنی تھی اس بے وفا کے ساتھ

کیفیت آشنا نہیں اس مست ناز کی

معشوق ورنہ کون ہے اب اس ادا کے ساتھ

منہ اپنا ان نے عکس سے اپنے چھپا لیا

دیکھا نہ کوئی آئینہ رو اس حیا کے ساتھ

ٹھہرا ہے رونا آٹھ پہر کا مرا علاج

تسکین دل ہے یعنی کچھ اب اس دوا کے ساتھ

تھا جذب آگے عشق سے جو ہر نفس میں میؔر

اب وہ کشش نہیں ہے سحر کی دعا کے ساتھ

میر تقی میر