یار سے اب کے گر ملوں تاباں

یار سے اب کے گر ملوں تاباں

تو پھر اس سے جدا نہ ہوں تاباں

یا بھرے اب کے اس سے دل میرا

عشق کا نام پھر نہ لوں تاباں

مجھ سے بیزار ہے مِرا ظالم

یہ ستم کس طرح سہوں تاباں

آج آیا ہے یار گھر میرے

یہ خوشی کس سے میں کہوں تاباں

میں تو بیزار اس سے ہوں، لیکن

دل کے ہاتھوں سے کیا کروں تاباں

وہ تو سنتا نہیں کسی کی بات

اس سے میں حال کیا کہوں تاباں

بعد مدت کے ماہ رُو 🌝آیا

کیوں نہ اس کے گلے لگوں تاباںؔ

عبدالحئ تاباں