بکھرے پڑے ہوئے ہیں جو لمحے ادھر ادھر

 بکھرے پڑے ہوئے ہیں جو لمحے اِدھر اُدھر

تسبیحِ وقت کے ہیں یہ دانے ادھر ادھر

شاید ہمارا عکس نہیں ہے وجود میں

ہیں اس لیے وجود کے حصے ادھر ادھر

واللہ! تیری آنکھ میں حیرت کو دیکھ کر

پھیلے ہوئے ہیں چار سُو شیشے ادھر ادھر

ہر ذی وقار شخص منافق ہے دوست

دیکھا ہے اس جہاں میں میں نے ادھر ادھر

ہے گام گام وصل کا امکان اس لیے

وحشت میں قید ہو گئے تارے ادھر ادھر

شانِ سکندری نہیں مجھ کو ملی تو کیا

شانِ قلندری ملی رو کے ادھر ادھر

بادل تمہاری یاد کے برسے ہیں رات گئے

تارے چھپے ہوئے ہیں نظارے ادھر ادھر

ماہِ تمام، بام و دریچہ، نگاہِ حسن

ساقی تمہی کو دیکھ کے نکلے ادھر ادھر

تُو دیکھ اب چمن میں شبستاں کو غور سے

پھولوں کے ساتھ ساتھ ہیں کانٹے ادھر ادھر

اپنا کسی سے کوئی تعلق نہیں ہے دوست

پھرتے ہیں ریگزار میں بھٹکے ادھر ادھر

خورشید کی طرح وہ ستارے بھی اب ندیم

رہتے ہیں اضطراب میں ڈوبے، ادھر ادھر

ندیم ملک