مرے خیال میں مہتاب جاگے رہتے ہیں

 مِرے خیال میں مہتاب جاگے رہتے ہیں 

میں سو بھی جاؤں تو کچھ خواب جاگے رہتے ہیں

بس ایک خواب نے نیندیں سبھی چرا لی ہیں

اس ایک خواب سے بے خواب جاگے رہتے ہیں

کہاں پہ دفن کروں اپنے خوف کو جا کر

کہ نیند میں بھی تو اعصاب جاگے رہتے ہیں

کسی نظام میں آثار تو نہیں دکھتے

مگر تباہی کے اسباب جاگے رہتے ہیں

زمانے بھر کے لیے کچھ نہیں سہی، لیکن

نظر میں ماں کی کئی خواب جاگے رہتے ہیں

میں لوٹ جاتا ہوں ماضی میں بات کرنے کو

بچھڑ گئے ہیں جو احباب جاگے رہتے ہیں

سکون سطح پہ تو کھیلتا ہے دیپ اکثر 

درونِ آب، گو گرداب جاگے رہتے ہیں 

حنیف دیپ