میں پلکوں پہ ستارے گن رہا ہوں

 میں پلکوں پہ ستارے گِن رہا ہوں

تِرے پندار سارے گن رہا ہوں

ابھی تو پار بھی اُترا نہیں ہوں

ابھی تو بس کنارے گن رہا ہوں

اب اپنے منظروں سے ہوں گریزاں

سبھی منظر تمہارے گن رہا ہوں

جو اِک نُقطے پہ آ کر جم گئی ہیں

اِن آنکھوں کے اشارے گن رہا ہوں

سفینہ⛵، ناخدا، کوئی کنارہ

عبث جھوٹے سہارے گن رہا ہوں

مِرا گھر جل رہا ہے، اور عابد

میں شعلوں میں شرارے گن رہا ہوں

عابد جعفری

آٹھواں سمندر