وہ بهی اک شام فروری کی تهی

 تِرا ہونا بہت ضروری ہے

وہ بهی اک شام فروری کی تهی

جب تِری خواب نما آنکهوں میں

میری چاہت کی دهنک اتری تهی

جب یہ ادراک ہوا تها مجھ کو

میرے جیون میں اجالوں کے لیے

تیرا ہونا بہت ضروری ہے

وہ بهی کیسا حسین عالم تها

مِری چاہت کے ہر اک موسم میں

عکس تیرا دکهائی دیتا تها

میری خاموشیوں کے پہلو میں

جب بهی کِهلتی تهی گفتگو تِری

دیر تک خوشبوؤں میں رہتا تها

تُو ہی محور تها زندگی کا مِری

جُزو ہستی کا مانتا تها تجهے

جُز تیرے، پاس کچھ نہیں تھا مِرے

تیری چاہت میرا اثاثہ تهی

وہ بهی اک شام فروری کی تهی

جس میں بکهرے تهے رنگ چاہت کے

جس کے خوشبو سے بهیگتے پَل میں

میرے شانے پہ اپنا سر رکھ کر

تُو نے اقرار کیا تها مجھ سے

تیرے جیون میں اجالوں کے لیے

میرا ہونا بہت ضروری ہے

تُو نے اس پَل میں زندگی دی تهی

میں نے جی لی تهی زندگی اپنی

یہ بهی اک شام فروری کی ہے

جس میں بکهرے ہیں رنگ چاہت کے

جس میں یادوں کی دهند میں لپٹا

تیرے دن رات سوچتا ہوں میں

تیری ہر بات سوچتا ہوں میں

جُز تِری یاد، پاس کچھ بهی نہیں

کوئی امید، آس کچھ بھی نہیں

دل یہ بوجهل ہے شدتِ غم سے

آج رونا بہت ضروری ہے

میرے جیون میں اجالوں کیلئے

تِرا ہونا بہت ضروری ہے

عاطف سعید