افسوس کہ وہ سرو گل اندام نہ آیا

 افسوس کہ وہ سروِ گل اندام نہ آیا

میت کو میری دیکھنے دو گام نہ آیا

نکلے ہیں مِری لحد سے اب نرگس و شہلا

شاید کہ تہِ خاک بھی آرام نہ آیا

شب بھر نہیں چمکا مِری قسمت کا ستارہ

وہ رشکِ قمر ہائے لبِ بام نہ آیا

چپ چاپ محبت کے ستم سہہ لیے دل پر

الفت کا مِرے سر کوئی الزام نہ آیا

ہر کس ہے تِری زلفِ چلیپا کا گرفتار

اے شوخ! کسی کے تُو تہِ دام نہ آیا

وہ دلزدہ ہوں عشقِ بتاں کا میں جہاں میں

جس کو دمِ عیسیٰ سے بھی آرام نہ آیا

داغوں سے جدائی کے ہے سینہ مِرا گلزار

صد حیف، تماشے کو گل اندام نہ آیا

پھولوں سے عزیزوں نے سجائی مِری تُربت

اے کاش، نظارے کو وہ گلفام نہ آیا

آغاز ہی ایسا تھا محبت کا کہ یارو

رونا ذرا بھی ہم کو بر انجام نہ آیا

میں سہہ نہ سکا جور و ستم یار کے حاوی

افسوس ہے میں یار کے بھی کام نہ آیا

حاوی مومن آبادی